Otan a nga dume Zo'o

A nga bo na, Nyat ve ka'a mesiñ. Nyate na,

"Mesiñ melu mebaé".

Nde bongô be nga kutane minku, bôt be nga tyap. Ve tyap. Melu mebaé, kpwas ! M'akpwan. Minkule mesiñ mi nga jô. Betit be nga kômesane mesiñ. Mfa'a Zok, Zip, Sô, Mvin, Ze, Ku betite bese, lututu ! Mesiñ me nga siñeban. Zo'o a nga ja bôt ébungu mesiñ, te fe môt a zômbô nye. Oyôm Otan ve kôlô si, ne ndap ! ndap ! nda ! nseñ. A bulane ke tabe si.

Mon étun, ve ne kitik ! Zo'o a beta kui ébungu. Otan a liti mo nseñ, nye na,

"Be yône'ma be zo'o mu".

Be nga yebe yôp. Ve Zo'o a ntele ne lumaa ! Zo'o na,

"Ye me ne siñ Otan ?"

Otan na,

"Mesiñ m'abôbo ajô, a Zok. Wo kôsa bo anen ane ô ne na, bi ayiane siñ".

Zo'o ve bulan mbé si, a nga ke a woé, a ke tabe si. Minkule mi nga jô yôp. Zo'o ve ne ze'elé ! ze'elé ! ze'elé ! a zu. A beta ke tebe ébungu mesiñ. Otan a de'ele mo yôp, nye na,

"Be yebe'e me mu".

Bôt ve ne wôô ! b'asô'ô yôp. Be kute mimfin. Be na,

"A Zok, mboko'o a di'i wo ônyu".

Otan a nga tek, kep ! kep ! kep ! Zo'o na,

"Jé é bo, a Otan ? Abima wo va, bia wo ke bi ne fô'ô jé ? W'ali'i zu, bi siñ".

Nde Zo'o a nga tebe, nye na,

"Za'a he".

Ne wôs ! ba Otan be nga somelan. Ve bete Otane yôp, a jô na, a vame nye si, Otan a vi'a tulane nye mebo zañ. Ve ke tebe analé. Otan a nga kebelan abôk. Minkule mi nga jô yôp. Otan a si'i mo si, ba Zo'o ve beta somelan. Zo'o a bete nye yôp, ne febebe ! a jô na, a vame nye si, Otan a vi'a nye tulan mva'an. A nga kebelan abôk. Minkule mi nga jô yôp. Bôt be benke mbé si, be Zo'o na,

"Ze é bi wo. Mboko'o a di'i wa jaé".

Otan ve beta so, ba Zo'o, ne wôs ! Zo'o a beta nye bete yôpe na, Otan ve yeme nye mo asañ. Zo'o a beta fe jô na, a fendé nye, Otan ve ne vo'olo ! mbô'alo. Zo'o ve fame ne kum ! kum ! kum ! Ve ke jimbi si, ne kum !Ve ne yap ! Otan a vam alo, a ke bebe nye abume yôp. Miñyôn mi kutan,

"Wuaa" ! Bôt be nga kute mimfin. Ngal é nga ke fé. Ane otan a nga dume Zo'o ana.