Nloñe Minlak

A nga bo na, Nloñe Minlak ve tabe, ba be bobenyañe bebaé, wua jôé na, Nwuwubu, nyô mbo’o na, Nbweñbwele. Nyina a tabe aku’u di, nyina aku’u di, émien ke zañ. Be to minkukum belale. Nde Nbweñbwele a li asan, fôn é mane vé. Foé ve tyi’i é ke koé Nwuwubu na,

“Monyoñ Nbweñbwele a yôya étua abui fôn, é nto bezôzô”.

A semen ajô, nye na,

“Ye mojañ a kôme di fôn, te ke me ve ? »

Alu viu ! Ve be’e beya, nye na,

“M’ake mane afup ete’se alu di”

Ve vam nseñ, a ke suane be Nloñ Minlak alu se. Nloñe Minla’a a vô’ôlô ane nginda j’azu, ki ki ki ki ! Nye na,

“Jé ji ?”

Ve nyokan a kui atan, a koé monyañ Nwuwubu a tele. A sili na,

“A mojañ, jé ? W’ake vé abim alu di ? A nsamba abim ava, w’ake vé ?”

Nwuwubu na,

“Nsili ôsu m’asili wo na, ye Nbweñbwele a veya wo fôn ? M’awô’ô na, é nto bezôzô”.

Nye na,

“Te keé, a veve ma”.

Nwuwubu na,

« M’akat wo na, m’ake mane afup ete se ne meñ alu di ».

Monyañe na,

« Ya, me wô’ôya, yange’e ma, m’azu »

A nyin nda, a to’é nlak. A vam atan, a zu koé nye nseñ, ve beté nla’anyu. Nla’a, koéé ! Tyé, ve ne ngeññ ! Monyañ a tebe ne vema ! Nloñe Minla’a na,

Be nga wô’ô bika’a nda, ba monyañ be nga di.

Nloñe Minla’a a bete mis, a yen nsamba, nye na,

“Jôké’é binga bese be ngunu va, bia wo bi ke be mojañ”.

Be ba’ate zen, ve kui be Nbweñbwele. Be za’ôyap, nde a yeneya ke be, ve té aba a zu wubane be. Nye na,

“A bobejañ, me yôya étua abui fôn, mi ate bene soo binga a jé, a zu be’e fôn ?”

Nwuwubu na,

“Ke binga be ngunu me be Nloñe Minlak”.

Nye na,

“Lo’o be, Nloñe Minla’a ke’a za’a émbé abui ».

Binga ve mane so, be lumbu a ke afup, be nga yuaé fôn zônga minkoé. Be vasan nlam, b’adi kpwet, b’adi fe bebômbô. Nloñe Minlak ba Nwuwubu be nyu’ulan, be nga ke b’asô’ôlan. Nloñe Minla’a a sili monyañe na,

“A mojañ, ye w’ate yeme na, a ke bo bia abim mvaé di ? »

Nwuwubu a bulane ja dé.

Nwuwubu ke a boya nka’alé bibé. A ke jii, a wôé na, ngôé mewô mela. Be nga litan ngôé fe. Foé ve tyik, é ke koé Nbweñbwele na,

« Monyoñ Nwuwubu a te wôé étua abui ngôé”.

Nbweñbwele a semé, nye na,

“Ye mojañ a wôéya abim ngôé di, ye teke me foé, t eke nku ye mi abele ?”

Alu viu ! nye beyale na,

« Kôla’ane si, Nwuwubu a wu alu di. B’aye di ngôé éte ve awu. A ye je di ».

Ve jimbi be Nloñe Minlak. Nloñe Minla’a a wô’ane nginda é ne ve yôp, ve kui atan, a ke koé na, Nbweñbwele a tele. Nye na,

« A mojañ jé ? »         

Nbweñbwele na,

« Ve ô wô’ô foé na Nwuwubu a te wôé ngôé mewôm mela, ye a loñeya wo nku ? Ye a kateya wo foé ? »

Nye na,

« Me nji wôk »,

Nbweñbwele na,

« M’ake wôé nye alu di ».

Nloñe Minla’a na,

« Tebe’e ».

A la’ate, ve to’é nlak, a koene nye, a beté nla’a biyaé. Nla’a, koéé ! Tyé, ngeññ ! Nbweñbwele a ntele ne vema ! Nloñe Minla’a na,

« O li’i binga va, ntame ke bia bebaé ».

Be ve yeme zen akui be monyañ, a koé na, be lita’an ngôé fé. Ane Nwuwubu a yene bobenyañ ôyap, ve té, a zu wubane be, a nyiñeli be aba. Nye na,

“M’ate wôé ngôé mewôm mela, m’ate yi na, ése é tame mane so fé. Nje ése é ngunu mewôm melale nyô”.

A bete awôm ngôé, a kee Nloñe Minlak. Awôm avok a kee Nbweñbwele. Awôm avok, nye na

“Mamien ke m’adi nyô a ja dam ese”.

Bobenyañe mo minku, a loñe beya. Beyale be maneya so, ve be nga litan ngôé, Nloñe Minla’a ba monyañ. Nde b’atéé.

Nloñe Minla’a na,

“O jô na, w’awôé monyoñ, ye ô yeme na, a bo bia ana ? »

Be mane ke ngôé male map, ve be nga di. Ajô te bi wô’ô jô na, nte Nloñe Minlak, ve bobenyañ be nga mane wôan.

Si bi to nyô den, za a ne bia Nloñe Minlak ?

Bôt b’ayiane tabe mvo’é
Ntañete ô nji bo mvaé zañe bôte.