Kôlô'ô Me Kolé

A nga bo na, mone ba nyia be to. Nyia mone na,

“Kele janyoñ, be môt bia nye bi ne abume da. Kele, a ve wo ékuti a nga bo je kum”.

Mon ve futi nyôle zen, a ke kui be ndômenyañ. Ndômenyañe na,

“A monam, w’ayi jé ?”

Mongô na,

“M’ayi akum. Me zuya na, ô ve me ékuti ô nga bo je kum”.

Ndômenyañe na,

« Teke’é, ô vo’o jibi ékuti éte, é ne étyi abé ».

Ve nyin, a bi na, mintômba awôm, binga benyin, bengone bebaé, ve ke nye. Mongô na,

“M’aben. A ndômejañ, ke’e me ve ékuti”.

Nye ve mane wôlane biôm bié bise, anyiñeli nda, nye na,

“Ye w’aye jibi ékuti ?”

Mongô na,

“Ya, m’aye jibi”.

Ndômenyañ ékuti, bap ! a kalane nye. Nye na,

“Ane ô lam ékuti jina, w’aye bobo na, ane w’aye bête na ô kolé, w’aye wô’ô na, “Kôlô’ô me kolé”. Awô’ô w’awô’ô nalé, ô vaa mo, te beta nambe. Ke ô wô’ôya, étyi ji ?”

Mongô na,

“Me wô’ôya”.

Nye na,

“Susu’a étyi le. Womien te kolé ékuti akekui awu”.

Mongô ve to’é ékuti, meban, nguuñ ! Ve vame ja dé.

Ve mane lam ékuti. Tyé kpwa, a ke jii, a ke koé na, évôm ngon é tii. Nye ve vaa évôm ngon. A ye kolé, a viane vô’ôlô na,

« Kôlô’ô me kolé ».

Mongo ékuti, boo ! minga énam, tos ! a ke ja, a ke liti nyia. Nyia a bôé ôyenga.

Bia tyé, a beta jii, a koé évôm éfe é tii. A beta tii, a ntele. A ye kolé ékuti, tyiñ é jôé,

“Kôlô’ô me kolé”.

Mongô ékuti, mias ! ve to’é minga a lumbu ja, ékuti éli’I é bô. Oyenga ve jô nlam. M’ake nlô asaé, ve na kabat, a bemvu, a mimbañ, a belo, jô te alañé, ve wu ékuti. Mongô ve bo kum.

Môse wu a beta té, a ke jii, a koé’na, mba évôm, abeñ abeñ, a tii. A mane tii nye, a telé, nya na,

« E ! Ai ! Ye môt a bo beta jam ane nyô, émien te kolé ékuti. Mamien m’atame kolé ékuti jam ».

A ye beta nambe ékuti, a vô’ôlô na,

“Kôlô’ô me kolé”.

Nye na,

“Me te yene môt, m’azu wu ve na, “Kôlô’ô me kolé », jé le ? A vo môt émien a nkolé’é ékuti jé, ve na, ‘Kôlô’ô me kolé ?’ »

Nye ékuti mo, ve ne lititi ! tik ! A beté afak, émien a koléya. Abebe é nga bebe afak, ne tik ! mona minga a nga tele, ve ne fi ! sot ! Jale se ve bôlé, kpweep ! alum a nga lum ékuti mvus, a kui jale ve ne ngo ngo ngo ! Ve nyia nyia, biôm bise bi maneya tup.

Ane mongô a nga li’i bua ana, a melo mé.

Môt a ndaman émien amu a bo mam me akut.