Jôm é ne akôm

A nga bo na, môt a nga loñe ja, mbama minka’a mibaé. Ve biaé bon abui. A nyoñ éto a kee ntô, nda a nga nyin, a mbe môta mintun. Nye ve tele ntun, a kobo, a jô na,

“Jôm é nto ja di, jôm é nto ja di, m’adidimi jôm, m’adidimi jôm”.

Beta akôme ke a saa nye nseñe yat ana, a viane vô’ôlô akôme yôpe na,

“M’adidimi jôm, m’adidimi jôm. O ne ve yemeyem, ô vo’o ke yeme ma. Eyoñ me ne nne, me ne ne aya ?”

Ane mie jale a nga ku évô, ve jô’é mekôñ, a ke tabe, fe’é jañeya nye abum.

Tyé kpwa, ngô’é ve beta vin, nye na,

« A bôte ya ja di, vô’ôla’an ajô dam. M’adidimi jôm, m’adidimi jôm, jôm é nto ja di, jôm é nto ja di”.

A vô’ôlô akôme yôpe na,

“M’adidimi jôm. O vo’o yeme ma. W’ayeme na, me ne aya ? »

Ve nyoñ akoñ, ve ke telé, ve nyin nda. A lo ntôle mone wé, nye na,

« A monam ».

Mone na,

“Eññ”.

Nye na,

“Eyoñ me nga biaé wo, jôm é ne wo ntô, ô boya jé ya ntô ? Akiti éyoñ m’aye beta kobô, ô ke me akôme yôp, ô yene me jôm j’akpwe’ele ma. O yene je aval ane é né. O zu kate ma, me yeme jôm éte ».

Tyé kpwa, mon a yale akôm, ve ke sobô. Ngô’é viu ! Nde ésa a nga tebe nseñ, nye na,

“A bôte ya ja di, vô’ôla’ane ma, m’adidimi jôm, m’adidimi jôm, jôm é nto ja di, jôm é nto ja di ».

A wô’ane a vam ako’été, mone ke a tele, a lô.

“W’adidimi jôm. O vo’o yeme ma. Ke w’ayeme  na me ne nne, me ne aya ? »

Ve mon a lô, ve mfa’a wua ébol ébo, dis mva’ane si. Mfa’a wua, ébole ne fiôk ! Mfa’a wua ke mfemen. Mo, mo me môt. Mfa’ a tebe, de ke mimbiaé mi tit. Mon a lô, nde a nga bulane ja.

Nné ane a mane kobô, ésa a jô’é ntum. Mon ve so. Nye ésa na,

« M’ate jaé kui ako’été. Mfa’a wua, ébol ébo, mfa’a mbo’o mfemen. Dise dé mva’ane si. Mfa’a ya mo, mo me môt, mfa’a ya si ke mimbiaé mi tit. A tat, ke m’ate kôme yene nye ve nalé ».

Tyé kpwa, ngô’é viu ! Ve nyokan ntum nseñe wé, nye na,

“Jôm é nto ja di, jôm é nto ja di. M’adidimi jôm, m’adidimi jôm”.

A wô’ô na,

« W’adidimi jôm. O ne ve yemeyem, ô vo’o yeme ma. Me ne aya-ôô ? Me ne aya-ôô. Me ne aya-ôô ?

Mie nlame ve kui anyu, nye na,

« W’andeñele me amu jé ? O ne na, dise dôé e ne mva’ane si, mfa’a wua ébole ébo, mfa’a wua ke mfemen. Mo, mo me môt. Mfa’a ya mebo, mimbiaé mi tit. O to valé, ô ne ako’été”.

Ve ne kubuk ! Ake ake di.

A nga li’i a tele mintune mintun ja dé, te fe wô’ô nkobô akôm.